Gihangyo sa Philippine National Police (PNP) ang mga dumadapig ni Pastor Apollo Quiboloy nga mokalma ug tugotan ang kapolisan sa paghimo sa ilang trabaho isip mga tigpatuman sa balaod.
Kini ang gitino ni PNP spokesperson Col Jean Fajardo human nagtapok ang mga supporter sa pastor kagahapong adlawa, Hunyo 10, ug nagbutang ug barikada atubangan sa Kingdom of Jesus Christ headquarters sa Davao City aron dili makasulod ang mga pulis nga mag-serve ug warrant nga wanted tungod sa child abuse, sexual abuse ug qualified trafficking cases nga gisang-at sa mga korte sa Davao ug Pasig.
Sa samang pamahayag, nanawagan kini kang Quiboloy nga mobarog ug atubangon ang iyang mga kaso aron malikayan ang susamang nahitabo kagahapon.
Matod niya, walay timailhan nga nibiya si Quiboloy sa Pilipinas base sa talaan sa Bureau of Immigration.
Nasayran nga dul-an sa 100 ka mga polis nga gipangulohan sa mga armadong operatiba sa Special Action Force ug Criminal Investigation and Detection Group ang nisulod sa mga propyedad ni Quiboloy kagahapon apan napakyas sila sa pagsikop sa nagpailang Appointed Son of God ug sa kauban niini.
Ang mga compound nga gisulod nahimutang sa Davao City, Samal Island, ug Sarangani.
