Gihukman og upat ka pagkapriso ang usa ka miyembro sa Kingdom of Jesus Christ (KOJC) tungod sa pagbabag kaniadtong pag-aresto sa ilang founder, nga si Pastor Apollo Quiboloy.
Napamatud-an sa Metropolitan Trial Court Branch 39 sa Quezon City nga sad-an si Eduardo Corda sa paglapas sa Section 13(a) sa Batas Pambansa Number 880 o ang Public Assembly Act of 1985 kalabot sa protesta nga gihimo niadtong Agosto 2024 sa KOJC compound sa Davao City.
Ang kaso naggikan sa mga protesta ug barikada sa mga supporters sa KOJC atol sa pag-isyu sa mga awtoridad og warrant of arrest batok kang Quiboloy.
Basi sa desisyon, ang mga nagprotesta nag-okupar sa bahin sa Philippine-Japan Friendship Highway gamit ang mga sakyanan ug uban pang barikada, nga miresulta sa pagbabag sa publiko atol sa mga operasyon sa kapulisan.
Bisan tuod nakakuha og permit ang grupo alang sa prayer rally ug candle lighting activity, apan gitabonan lang niini ang kalihokan sulod sa KOJC compound.
Ingon man nga nangatarungan ang kampo sa miyembro sa KOJC sa pagdungog nga dili siya ang nag-organisar sa ilegal nga mga kalihokan ug naglihok isip ministerial o peacekeeping role atol sa panagtapok.
Bisan pa, ang desisyon nag-ingon nga giisip sa mga awtoridad si Corda nga usa sa mga lider sa asembliya, base sa iyang paggamit og megaphone ug coordination sa panon sa katawhan atol sa kagubot.
Gipaambit sa kanhi PNP Chief ug karon MMDA general manager nga si Nicolas Torre III ang desisyon sa korte sa iyang online account.
Sa iyang caption, si Torre miingon nga ang desisyon sa korte dili usa ka selebrasyon o panimalos apan usa ka yano nga pahinumdom nga ‘ang balaod balaod.’
Si Torre, kinsa nagsilbi isip Davao Regional Police Chief, ang nanguna sa pag-aresto kang Pastor Apollo Quiboloy.
