Gisugdan na sa Philippine National Police (PNP) ang usa ka nationwide manhunt kang Sen. Ronald “Bato” dela Rosa kalabot sa warrant of arrest nga gi-isyu sa International Criminal Court (ICC).
Sumala ni PNP chief Gen. Jose Melencio Nartatez Jr., ang mga tracker team gipadala human gitugotan sa Department of Justice (DOJ) ang pagpatuman sa pag-aresto batok sa senador.
Miingon si Nartatez nga gimandoan ang mga pulis nga ipatuman ang maximum tolerance ug sundon ang due process sa operasyon aron mapanalipdan ang mga katungod sa tanan nga nalambigit.
Dugang niya nga kon madakpan si Dela Rosa, dad-on dayon siya sa kustodiya sa DOJ.
Samtang, wala gibutyag sa DOJ kon dad-on ba dayon si Dela Rosa sa The Hague, Netherlands, diin nahimutang ang ICC detention facility.
Gikumpirma usab sa Criminal Investigation and Detection Group (CIDG) nga aduna silay kopya sa ICC arrest warrant batok sa senador.
Nagpasidaan ang pulis nga bisan kinsa nga motabang o mobabag sa pagpatuman sa warrant mahimong mapasakaan og kaso nga obstruction of justice.
Gawas sa PNP, ang National Bureau of Investigation (NBI) nagpahigayon usab og lahi nga operasyon aron makit-an ang senador.
Sumala ni NBI Director Melvin Matibag, ilang dakpon dayon si Dela Rosa kon ilang masubay siya.
Samtang, gihimakak ni Sen. Robinhood Padilla ang pasangil nga iyang gitabangan si Dela Rosa nga makaikyas gikan sa Senado.
Giinsistir usab ni Padilla nga wala niya giisip si Dela Rosa nga usa ka “pugante” ug nagtuo nga ang proseso sa balaod ang angay nga mopatigbabaw sa Pilipinas.
