CEBU CITY-Walay natala nga insidente ang Police Regional Office 7 atol sa unang adlaw sa pag-abli sa klase sa mga pribado ug pampublikong tunghaan sa Central Visayas gahapon, Agosto 29.
Matod ni Police Lieutenant Colonel Gerard Ace Pelare ang spokesperson ni Police Brigadier General Anthony Aberin nga hapsay ug malinawon ang pag-abli sa klase gawas lang sa pag huot sa dagan sa mga sakyanan.
Dugang pa, nga hugot nga gimonitor sa kapulisan ang pag abli sa klase alang sa kaluwasan sa mga tinun-an, hinungdan nga adunay gimontar nga kapin sa 600 ka nga police assistance desk sa matag tunghaan ug gipakatap usab ang 2,200 ka mga police personnel.
Mipasabot si Pelare nga mimando si PRO-7 Director Aberin sa tanang City ug Provincial Police Office commanders nga ipadayon ang ilang pagpakatap sa mga police lakip na ang pag bisita sa mga tunghaan.
Gani gidasig ang mga station commanders nga motambong kon dunay mga kalihukan nga himuon ang eskwelahan sama sa Parent Teacher Association meeting aron madungog nila kon unsay mga problema nga ilang gisagubang ug mahatagan usab og tambag ang mga ginikanan nga sila mismo ang mobantay sa ilang mga anak.
Usa sa tumong sa pagsalmot sa mga police sa kalihukan sa eskwelahan aron mabadlong kadtong mga bata nga mosulod sa gang nga makabalda na hinuon sa ilang pag tapos sa ilang pagtuon.
