Gikatahong ‘manipulated’ ang polvoron video nga mipakatap sa adlaw mismo sa miaging SONA ni Presidente Ferdinand R. Marcos Jr.
Kini ang mga nahibal-an sa mga eksperto sa AI gikan sa Deepfakes Analysis Unit nga bahin sa Misinformation Combat Alliance nga nakabasi sa India.
Matud pa nga ang mga nagpaluyo sa polvoron video nigamit sa SensityAI tool ug nakakita sa ‘face swap’ manipulation nga gihimo sa Hive tool nga gigamit sa video.
Nasayran nga mismong ang fact checker nga Vera Files ang nagpadala sa video ngadto sa India-based misinformation advocate aron susihon ang video nga giingong nikatap sa kataposang State of the Nation Address (SONA) sa Chief Executive niadtong milabay nga Hulyo.
Kalabot niini, si Presidential Communications Office (PCO) Acting Secretary Cesar Chavez miingon nga mao kini ang nagpamatuod nga adunay indibidwal nga nagtumong nga gub-on ang dungog sa Presidente.
Gipahinumdoman usab ni Secretary Chavez ang publiko nga mag-amping sa mga malisyosong video ug mga post sa social media nga gipakaylap sa mga tawo nga dili tinuyo.
Matud pa niya nga sa panahon karon sa mga troll, bot, ug deepfakes, sayon na lang ang pagpakatap og pagbutangbutang sa usa ka indibidwal.
