Nagpasalamat si Pope Leo XIV sa mga Katolikong nagpadayon sa pag-ampo alang sa iyang pagkaayo, pinaagi sa iyang unang mensahe human sa operasyon alang sa kanser sa baga.
Sa mensahe nga gipadala ngadto sa mga partisipante sa symposium nga nagtimaan sa ika-10 nga anibersaryo sa ‘Amoris Laetitia’, mihangyo ang Santo Papa nga ipadayon ang pag-ampo alang kaniya ug misaad nga iampo usab niya ang mga partisipante.
Gipasiugda usab sa Papa ang bili sa pag-ampo, pagpaambit sa mga kasinatian ug pagpaminaw sa usag usa, nga iyang gihulagway isip bililhong gasa alang sa Simbahan.
Gipaoperahan si Pope Leo sa Gemelli Hospital sa Roma, Italya, diin gikuha sa mga doktor ang ubos nga bahin sa iyang tuo nga baga human madiskobrehan nga siya adunay ‘lung adenocarcinoma’, usa ka matang sa kanser sa baga.
Sumala sa iyang mga doktor, gilauman nga hapsay ang pagkaayo sa 71-anyos nga Santo Papa.
Nakahimo na usab siya sa paglakaw-lakaw sulod sa iyang lawak sa ospital samtang nagpadayon ang iyang pagkaayo.
Samtang, temporaryong gikansela sa Vatican ang iyang mga publikong kalihokan hangtod Oktubre 20 aron mahatagan siya og igong panahon sa pagpahulay ug pag-ayo.
