Gipaalerto sa gobyerno sa Pilipinas ang mga katugbang niini sa Portugal ug uban pang mga nasud aron pangitaon ug dad-on balik sa Pilipinas si kanhi Ako Bicol Party List Representative Zaldy Co, kinsa gideklarar nga pugante.
Kini human unang gibutyag ni Sec. Remulla nga ang katapusang lokasyon ni Co sa nasud nga Portugal hinungdan nga hugot kini nga gimonitor.
Sumala sa kalihim, ang tanang nasud ug tanang sentro sa mga transnational crimes sa tibuok kalibutan gipahibalo na bahin sa pagkanselar sa pasaporte ni Co.
Giangkon usab ni Remulla nga ang proseso taas ug hinay kon bahin sa internasyonal nga balaod, apan miingon siya nga nakig-alayon na sila sa ilang mga katugbang.
Kahunumduman nga gihimakak ni Co ang mga akusasyon batok kaniya ug hinoon gitudlo si Presidente Ferdinand Marcos Jr. nga mao ang nagpaluyo sa giingong P100 bilyon nga budget insertions sa 2025 national budget para sa mga proyekto sa imprastraktura, nga gitawag sa Palasyo sa Malacañang nga walay basehan ug puro espekulasyon.
Mahinumduman usab nga si Co, usa sa 16 ka akusado sa kasong graft ug malversation nga may kalabotan sa anomalous flood control project sa Oriental Mindoro.
