Gikatakdang mangulo si Presidente Ferdinand “Bongbong” Marcos Jr. sa inagurasyon sa Cebu Bus Rapid Transit (CBRT) Project – Package 1 karong Nobiyembre 5, 2025.
Kini ang gipahibawo ni Cebu City Mayor Nestor Archival sa press conference niadtong Lunes, Oktubre 20, nga ang inagurasyon ipahigayun sa Osmeña Boulevard Station sa dakbayan sa Sugbo, nga nagtimaan sa opisyal nga pag-abli sa unang operational segment sa P28.78-billion nga CBRT system.
Sugdan ang inagurasyon gikan sa alas 10 sa buntag hangtod sa alas 11, nga magbida sa usa ka ceremonial BRT ride uban ni Presidente Marcos, Department of Transportation (DOTr) Secretary Giovanni Lopez, mga opisyal sa dakbayan sa Sugbo, ug mga mahinungdanong stakeholders, lakip ang CIBUS ug BFP-7.
Naglangkob sa 2.38 ka kilometro ang Package 1 nga rota gikan sa Cebu South Bus Terminal paingon sa Kapitolyo Probinsyal subay sa Osmeña Boulevard.
Kini ang una sa pipila ka mga hugna nga moabot ngadto sa 13 kilometros, nga magdugtong sa South Road Properties (SRP) ngadto sa Ayala Center Cebu ug unya molapad paingon sa Bulacao ug Talamban.
Matod sa DOTr, ang CBRT gidesinyo sa paghatag og paspas, kasaligan, ug eco-friendly nga transportasyon, pagpagaan sa kahuot sa trapiko samtang nagpasiugda sa mas limpyo nga paglihok sa kasyudaran.
Giila usab ni Archival ang mga hagit nga giatubang sa proyekto apan nagpabilin ang pagkamalaumon nga ang sistema makakuha og suporta sa publiko sa higayon nga masinati kini sa mga pasahero.
Dugang usab sa Mayor, nga ang siyudad nangayo og mga kalamboan sa wala pa ang hingpit nga paglusad, lakip na ang pagbutang og mga bollards, marker, ug directional lane, aron mas maayo nga ma-delineate ang mga bus lanes gikan sa nagkasagol nga trapiko ug masiguro ang kaluwasan sa mga commuter.
Giawhag usab niya ang publiko nga magpabiling mapailubon ug suportahan samtang nagpadayon ang mga pagbag-o sa panahon sa pagbalhin sa hingpit nga operasyon.
