TAIWAN-Nanawagan si Taiwan President Lai Ching-te alang sa panaghiusa batok sa giingong hulga sa China.
Gihimo ni Pres. Lai ang apelar sa Inter-Parliamentary Alliance on China Summit nga gitambungan sa mga parliamentarians gikan sa lainlaing mga nasud sama sa Uruguay, Canada, Japan, UK, ug 19 ka uban pang mga nasud.
Usa sa mga nag-unang gikabalak-an sa grupo mao ang paagi sa pag-atubang sa China sa ubang mga nasud.
Sa mensahe ni Pres. Lai sa grupo sa mga magbabalaod, gipasiugda niini nga ang hulga sa China sa bisan asang nasud nahimo usab nga hulga sa tibuok kalibutan.
Dugang pa niini nga buhaton sa Taiwan ang tanan aron mapadayon ang prinsipyo sa demokrasya ug makigtambayayong sa mga demokratikong kauban niini.
Sa samang higayon, gipasalamatan ni Lai ang mga nasud nga nagsuporta sa Taiwan, bisan pa sa hulga nga giingon sa China sa Taiwan.
Gipasalig sa bag-ong lider sa Taiwan nga andam ang iyang administrasyon nga makig-dayalogo sa China aron makab-ot ang kalinaw ug kalig-on tali sa China ug Taiwan.
Gitawag sa China si Lai nga ‘delikado nga separatista’ tungod sa iyang baruganan sa kaugalingon nga soberanya ug awtoridad sa Taiwan, butang nga nakapasuko sa mainland China.
Pipila ka adlaw human siya midaog isip presidente, nagpahigayon dayon ang China og mga war games sa palibot sa Taiwan ug nagpadala og fighter jets ug naval vessels isip ‘silot’ sa posisyon sa bag-ong presidente.
