Namatay ang lima ka tawo, lakip ang duha ka security guard, human gipabuthan sa mga rebeldeng Houthi og lima ka missile ang presidential palace complex sa siyudad sa Aden, habagatang Yemen, niadtong Huwebes.
Luwas ug wala maunsa ang prime minister sa Yemen ug ang mga miyembro sa iyang gabinete nga anaa sa Maashiq Presidential Palace atol sa pag-atake, sumala ni Information Minister Moammar al-Eryani.
Matod ni Yahya Saree, tigpamaba sa militar sa Houthi, kabahin ang maong pag-atake sa ilang polisiya nga puntiryahon ang mga pwersang militar sa Saudi Arabia bisan asa kini makit-an.
Sumala sa Saba News Agency, nga gidumala sa mga Houthi, lakip sa mga gipuntirya ang hedkuwarter sa mga operasyon militar sa Saudi Arabia ug usa ka tipiganan sa mga armas sulod sa maong complex.
Samtang, nagtaho ang mga saksi nga nakadungog sila og kusog nga mga pagbuto sa palibot sa palasyo.
Gipahugtan usab sa mga awtoridad ang seguridad sa tibuok rehiyon human sa pag-atake.
