CENTRAL VISAYAS-Nipahinumdom ang Police Regional Office sa Central Visayas (PRO-7) sa ilang mga personahe nga dili manghilabot sa mga kampanya sa mga kandidato nga magpapili sa umaabot nga Barangay ug Sangguniang Kabataan Elections (BSKE) 2023.
Kini maoy pahimangnu ni Police Brigadier General Anthony Aberin, ang direktor sa Police Regional Office Central Visayas (PRO-7).
Nitambong si Aberin isip guest speaker atol sa assumption of office ceremony sa bag-ong provincial director sa Cebu Police Provincial Office (CPPO) nga gipahigayon niadtong Miyerkules, Oktubre 4,2023.
Atol sa iyang pakigpulong, gipahinumdoman ni Aberin ang mga opisyal sa pulisya nga gamiton ang ilang mga katungdanan sa hustong paagi ug magpabiling neyutral sa natad sa politika.
Gihimo kini isip tubag sa mga taho nga nadawat sa regional director nga adunay duha ka hepe sa kapulisan ug tulo ka police non-commissioned officers nga aktibong nisalmot sa pagpangampanya sa mga kandidato nga ilang gusto.
Hinuon, ang direktor nagdumili sa pagbutyag sa mga ngalan sa hingtungdan nga mga opisyal o sa ilang dapit nga gidestino.//
Gitambagan ni Aberin ang mga pulis nga gusto manghilabot sa mga kalihokan sa politika nga mobiya sa puwersa ug moapil na sa politika.
Mipadangat usab og mensahe si Aberin ngadto sa mga police personnel nga nasuta nga naglambigit sa ilang kaugalingon sa politika nga na-relieve na sa ilang katungdanan.
