CENTRAL VISAYAS- Gipahimangnoan sa Police Regional Office 7 (PRO-7) ang publiko nga likayan ang pagpakatap og sayop nga impormasyon nga makahatag og kahadlok ug kalibog sa katawhan.
Gipasiugda ni PRO-7 Regional Director PBGen Redrico A. Maranan nga ang magpakaylap og fake news aduna’y tulubagon sa balaod.
Gidugang niini,nga dako kini’g epekto sa seguridad ug kalinaw sa komunidad, ug seryoso silang motubag batok sa bisan kinsa nga mogamit sa social media aron magpakaylap og bakak nga impormasyon.
Kini nga pahimangno may kalabutan sa kaso batok sa vlogger nga si “Jaissle” nga nag-post og video kabahin sa giingong snatching sa usa ka bus sa Liloan, Cebu.
Apan, base sa imbestigasyon sa Kapulisan, napamatud-an nga personal nga panagsungi ra sa pasahero ang nahitabo ug dili tinuod nga krimen. Ang video mikatap niadtong Hulyo 22, 2025.
Sumala ni PLT Joshua V. Cruz, Assistant Team Leader sa Cebu Provincial Cyber Response Team (PCRT), ang reklamo gipasaka pinaagi sa Regional Anti-Cybercrime Unit 7 (RACU7) ngadto sa Office of the City Prosecutor sa Dakbayan sa Sugbo.
Gipasaka ang kaso ubos sa Article 154 sa Revised Penal Code ug Section 6 sa Cybercrime Prevention Act of 2012.
Si “Jaissle” nag-atubang og posible nga 6–12 ka tuig nga pagkabilanggo.
Sa pagkakaron, gipaabot pa ang desisyon sa korte kon pagagawasan ba siya og warrant of arrest.
