CENTRAL VISAYAS- Gipahigayon ang usa ka seremonya sa Camp Sergio Osmeña, Sr., Cebu City, isip paghandom sa 44 ka namatay nga miyembro sa Philippine National Police – Special Action Force (SAF) nga misakripisyo atol sa operasyon sa Mamasapano.
Nagtigom ang mga opisyal sa Police Regional Office-7, mga sakop sa pulisya, ug mga importanteng hingtungdan nga naghalad og mga pag-ampo ug mga bulak isip pasidungog sa SAF 44.
Nagsilbing pasidungog ang seremonya sa ilang kaisog, dedikasyon, ug kabayanihan, nga nagpamatuod pag-usab sa malungtarong pasalig sa PNP sa pagpadayon sa ilang kabilin ug sa mga mithi sa serbisyo, dungog, ug sakripisyo.
Matud ni Police Regional Director PBGEN Redrico A. Maranan, nga ang adlaw sa Nasudnong Paghandum dili lamang mahitungod sa paghinumdom sa nahitabo, apan paghinumdom kini sa ilang katakos sa serbisyo og kaisog sa pagsakripisyo ug pagbag-o sa saad dili lamang isip mga opisyal sa pulisya, apan isip mga Pilipino.
Subay usab niini, mipahigayon usab og candle lighting ang mga sakop sa Cebu City Police Office sa susamang paghandom sa SAF 44 kagahapong adlawa.
Mipadayag sa iyang mensahi si PCol. City Director George Ylanan, nga subay sa paghinumdom sa kabayanihan sa SAF 44 gihimug-atan niini nga ang pagsakripisyo og kabayanihan isip sakop sa kapulisan dili kinahanglang makalas ang kinabuhi, apan ang presensya og padayong pagserbisyo sa publiko og nasud ang labing mahinungdanon.
Gipamatud-an pag-usab sa PRO7 ang ilang pasalig sa pagpreserbar sa kabilin sa SAF 44 pinaagi sa pagpalig-on sa propesyonalismo, pagkamay-tulubagon, ug dedikasyon sa serbisyo publiko.
Nagpakita isip usa ka malinawon nga pahinumdom ang wreath-laying ceremony nga ang ilang sakripisyo dili gayud malimtan, ug nga ang ilang kabayanihan magpadayon sa pagdasig sa mga sakop Philippine National Police sa pagpanalipod sa kalinaw ug seguridad sa Central Visayas ug sa tibuok nasud.
