Nakatala ug usa ka kaso sa tigdas o measles ang Probinsya sa Bohol, kini ang gikumpirmar sa Local and Health support Division sa Department of Health Central Visayas nga si Dr. Van Philip Baton, matud niini, ang batang pasyente wala mabakunahi batok sa tigdas, nga usa sa mga hinungdan sa risgo sa pagkadaot sa panglawas tungod sa maong sakit.
Gipasabot niya ang kamahinungdanon sa regular nga pagbakuna sa mga bata isip epektibong paagi sa pagpanalipod kanila batok sa tigdas ug uban pang sakit nga mapugngan pinaagi sa bakuna.
Gihangyo usab ang mga ginikanan ug mga tig-atiman sa mga bata nga sigurohong kompleto ang ilang bakuna aron malikayan ang pagkatag sa maong sakit sa komunidad.
Matud niya, ang booster shot gikinahanglan aron mapalig-on ug mapadugay ang proteksyon sa lawas batok sa maong sakit, bisan pa man og nakadawat na og unang dose sa bakuna ang usa ka bata, gikinahanglan gihapon ang sunod nga dose aron masiguro nga igo ang lebel sa proteksyon.
Giklaro usab sa opisyal nga dili bag-o ang bakuna batok sa Tipdas apan dekada na kining gigamit sa Pilipinas og walay nahatag nga dautang epekto.
Samtang sa pikas bahin, mipahimangno usab si Dr. Em-em A. Uy, ang Bohol Provincial Health Officer, nga dili magpakatap og sayup nga mga impormasyon hilabi na maylabut sa pagbakuna, gumikan kay makamugna kini og kadaot ug kahadlok sa publiko.
Gihimug-atan niini, nga kung adunay wala mauyoni sa mga pagpatuman sa mga medical experts hilabi na sa kagamhanan, mahimo rang dili manginlabot apan dili ang pagpang-angin sa uban.
