CEBU PROVINCE-Pahugtan ang relasyon tali sa Probinsya sa Sugbo ug sa Gangwon Province ang tumong ug tuyo sa pagsalmot ni Gobernador Gwendolyn Garcia sa South Korea, atol sa gipahigayun nga 18th East Asia Tourism Forum (EATOF) sa naasoyng Nasud gikan sa Septiyembre 21 hangtod 24.
Kini ang gitino ni Provincial Board Member Glenn Soco, kung diin kini subay usab sa imbitasyon ni EATOF Secretary General Jun Tae Hyeon, kinsa personal nga nag-imbitar sa gobernador atol sa iyang pagbisita sa Kapitolyo niadtong Agosto 30.
Dugang pa, nga sa pagbalik sa torismo sa Probinsiya, ang pinakadaghan nga arrivals o nibisita sa Probinsya sa Sugbo ang mga koreano.
Hinungdan nga gitataw ni Gobernador Garcia atul sa meeting nga mas gusto niya nga mag-establisar og mga direct flights nga magdugtong una sa duha ka probinsiya, ug iapil kini sa Suroy-Suroy Sugbo.
Kini gumikan kay ang Cebu ug Gangwon pulos founding member sa East Asia Tourism Forum (EATOF) ug managsuon usab nga probinsya./
Sa pikas bahin, gikalipay ni Soco ang maabi-abihon nga paghangup sa mga koreano sa ilahang pag-abut, hinungdan nga naghinaot kini nga mas mapalig-on pa ang relasyon sa Probinsya sa Sugbo ug sa Gangwon Province.
Nasayran, nga si Gobernador Garcia maoy bugtong langyaw nga mamumulong nga giimbitar sa paghatag ug pakigpulong atol sa pagbukas sa Gangwon Forestry Exhibition sa Gangwon Province ug pagpaambit sa labing maayong mga gawi sa turismo sa Sugbo.
Atol sa paniudto gahapong adlawa, ang miduyog usab kang Gobernador Garcia ug sa delegasyon sa Sugbo ang Gobernador sa Tuv, Mongolia, D.Munkhbaatar.
