Giaprobahan sa House of Representatives sa ikatulo ug katapusang pagbasa ang House Bill 10858 o ang gisugyot nga P7.2-trilyon nga national budget alang sa 2027.
Nakuha sa maong balaodnon ang 281 ka boto nga pabor, 13 ka supak, ug usa ka abstention.
Nahitabo ang pag-apruba 62 ka adlaw human nadawat sa house ang proposed spending plan gikan sa Department of Budget and Management o DBM.
Matod ni House Speaker Faustino “Bojie” Dy III, gituman sa Kamara ang ilang saad sa katawhang Pilipino nga masiguro nga ang matag sentimo sa buhis igahin sa hustong mga gastohan.
Ipadala na ang gisugyot nga badyet ngadto sa Senado alang sa pagrepaso ug deliberasyon.
Human niini, magpahigayon ang mga magbabalaod og bicameral conference committee aron ipahiuyon ang bersyon sa badyet sa House ug Senado sa dili pa isumite ang pinal nga bersyon kang President Ferdinand Marcos Jr. alang sa pag-apruba.
