Gipadayag ni House prosecutor Atty. Chel Diokno nga ang tumong sa ilang hangyo sa request for admission mao ang pagpadali ug pagpahapsay sa mga proseso sa impeachment case batok kang Vice President Sara Duterte.
Atol sa ika-30 nga adlaw sa impeachment trial, gipahayag ni Diokno nga nagtinguha ang prosekusyon nga matumbok ang mga tinuod nga punto sa panagbangi, aron malikayan nga mag-usik og panahon ang impeachment court sa mga butang nga mahimo ra untang ilhon o dawaton sa habig sa respondent.
Sumala niini, nga ang hangyo alang sa request for admission naglangkob sa pipila ka mga rekord sa bangko nga direktang gisumite sa mga bangko ngadto sa korte agig tubag sa mga subpoena.
Sa pikas bahin, gipasiugda ni Atty. Sheila Sison, lead defense counsel ni Vice President Sara Duterte, nga dili angay ibaliwala ang konstitusyonal nga katungod sa bise presidente batok sa self-incrimination o pagpugos sa usa ka tawo nga maghatag og testimonya batok sa iyang kaugalingon.
Kini ang gipahayag ni Sison kalabot sa hangyo sa prosekusyon nga magpahimo og admission o pag-ila sa mga kamatuoran atol sa nagpadayong impeachment trial batok sa bise presidente.
Matod ni Sison, ang mga desisyon ug Jurisdiction sa Korte Suprema nga nagpanalipod sa maong katungod dili lamang magamit sa mga kasong kriminal, kondili lakip usab sa mga prosesong administratibo, ilabi na kung kini adunay seryoso nga mga sangputanan sa hingtungdan.
Dugang pa sa abogado, dugay nang giila sa Korte Suprema ang katungod sa mga respondent ug akusado nga magpabiling hilom ug dili pugson sa paghatag og testimonya nga mahimong gamiton batok kanila.
Samtang, gipahibalo usab sa kampo sa depensa nga andam silang hisgotan ang sugyot sa prosekusyon nga bawion ang maong hangyo puli sa usa ka stipulation o pormal nga kasabutan sa mga kamatuoran.
Gisaad usab sa depensa nga isumite sa sinulat nga porma ngadto sa impeachment court ang ilang detalyadong mga argumento kalabot sa maong isyu.
