Nahimong sentro ang taas ng diskusyon sa ikatulong status conference sa International Criminal Court (ICC) ang
daghan nga mga ebidensya nga gamiton sa pagdungog batok kang kanhi Presidente Rodrigo Duterte.
Unang gipasiugda ni Presiding Judge Joanna Korner ang kapin sa 15,000 ka mga ‘exhibit’ o ebidensya ug gipahinumdoman ang prosekusyon nga likayan ang paglakip sa mga materyales nga balik-balik o adunay gamay ra nga kalambigitan sa kaso.
Gipasabot sa prosekusyon nga dakong bahin sa maong gidaghanon naglangkob sa halapad nga ‘dataset’ gikan sa Philippine National Police (PNP) nga adunay impormasyon bahin sa mga namatay sa kampanya batok sa ilegal nga droga.
Sumala sa prosekusyon, natala sa PNP ang gibana-bana nga 3,420 ka mga kamatayon nga resulta sa mga operasyon sa kapulisan sa tibuok nasud sulod sa maong panahon.
Samtang, ang abogado sa depensa ni Duterte nga si Peter Haynes nagpadayag og kabalaka bahin sa hilabihang kadaghan sa mga dokumento nga kinahanglan nilang susihon.
Gawas sa kapin 15,000 ka mga ‘exhibit’ nga dili gikan sa mga saksi, iyang gihisgutan ang presensya sa kapin 3,000 ka mga butang nga may kalabotan sa mga saksi, lakip na ang mga dokumento nga kulang ang mga panid, mga ‘duplicate’ o doble nga mga dokumento, ug mga sayop nga pag-ila.
Busa, nanawagan ang depensa alang sa paghimo og bag-ong ‘case file’ ug mihangyo nga limitahan ang mga dokumento nga ipresentar ngadto sa mas gamay nga gidaghanon.
Gihatagan sa ICC ‘chamber’ ang depensa og pito ka adlaw aron mag-file og ‘motion’, samtang giawhag ni Judge Korner ang duha ka habig nga hisgutan ang mga reklamo ug sulayan nga sulbaron ang isyu nga dili na kinahanglan ang interbensyon sa korte.
Subay niini, magpabilin sa detensyon sa The Hague si kanhi Presidente Rodrigo Duterte human mihukom ang Trial Chamber III sa International Criminal Court (ICC) nga walay mahinungdanong kausaban sa mga sirkumstansya nga makapamatarong sa iyang pagpagawas.
Matod sa mga maghuhukom, nagkadako ang posibilidad nga moatubang si Duterte sa pagdungog ug, kon mapamatud-ang sad-an, makadawat og taas nga silot sa pagkabilanggo. Tungod niini, nagpahayag ang Chamber nga adunay risgo nga mosibat siya o daw manghilabot ug mohulga sa imbestigasyon ug mga proseso sa korte.
