PROVINCE OF CEBU-Malipayong gipaambit ni DepEd-7 Director, Dr. Salustiano Jimenez, nga nagmalampuson ug hapsay nga nahuman ang mga aktibidad sa gipahigayon nga ‘Provincial Sports and Cultural Meet-2024 ‘ nga gipahigayon sa City Of Naga Sports Field Oval.
Mao kini ang gipahibalo ni Dr. Jimenez, uban sa pagtimbaya sa mga magtutudlo sa Cebu Province Division, ingun man ang iyahang pagpasalamat kang Cebu Provincial Governor Gwendolyn Garcia, ug sa mayor sa City of Naga nga si Mayor Valdemar M. Chiong, gumikan dili kini magmalampuson kung wala ang ilang gihatag nga suporta.
Ingon man ang pasalamat niini sa labawng makakagaham sa tanan, nga hapsay ug ang kanindut sa lakat sa panahon, hinungdan nga wala’y natala nga mga insidente atol sa usa ka semana nga kalihokan.
Kung kahinumduman nga ang maong kalihukan pormal nga gi-ablihan niadtong Marso 1, nga gisalmotan sa tanang pampublikong tunghaan ubos sa Department of Education sa Probinsiya sa Sugbo.
Diin ang mga estudyanteng atleta gikan sa elementarya ug high school level sa Department of Education Cebu Province nagtigi sa kahigayonan nga makarepresentar sa Sugbo sa Central Visayas Regional Athletic Association o mas naila nga CVIRAA.
