PROVINCE OF CEBU- Nasikop sa usa ka buy-bust operation ang duha ka high-value targets (HVTs) nga giingong namaligya og ilegal nga droga sa Argao, Cebu, gabii sa Abril 17, 2026, sa Purok Diamond, Barangay East Poblacion, Naga City.
Gipahigayon ang operasyon sa Philippine Drug Enforcement Agency (PDEA) Cebu Provincial Office uban sa Naga City Police Station, nga miresulta sa pagdakop nila alias “Dodong,” 36 anyos, welder, ug alias “Anthony,” 32 anyos, automotive mechanic, parehong residente sa Argao.
Sumala kang PDEA Regional Office 7 Director Joel B. Plaza, nadakpan ang duha human sa usa ka bulan nga case buildup nga nagsugod gikan sa impormasyon sa usa ka walk-in informant.
Nadiskobrehan sa mga otoridad nga mokabat og 50 gramos nga shabu matag semana ang ilang ginabaligya sa Argao.
Narekober sa operasyon ang lima ka pakete sa gidudahang shabu nga may gibug-aton nga kapin 50 gramos ug gibanabanang balor nga P340,000, lakip ang buy-bust money, duha ka cellphone, usa ka sedan, ug uban pang ebidensya.
Nasuta usab nga si alias “Dodong” adunay daan nang rekord sa pagkaaresto may kalabotan sa ilegal nga droga niadtong 2016, samtang si alias “Anthony” bag-ong nadugang sa listahan sa mga drug personalities sa lugar.
Ang tanang ebidensya gidala na sa PDEA RO-7 laboratoryo alang sa eksaminasyon, samtang ang mga nadakpan gipabilin sa kustodiya sa detention facility sa Lahug, Cebu City.
Atubangon sa duha ang kasong paglapas sa Section 5 (sale of dangerous drugs) ug Section 11 (possession of dangerous drugs) ubos sa Republic Act 9165 o Comprehensive Dangerous Drugs Act of 2002, nga adunay silot nga life imprisonment ug multa nga moabot hangtod P10 milyon kung mapamatud-an nga sad-an.
