Andam si kanhi Presidente Rodrigo Duterte nga molupad balik sa Manila aron atubangon ang mga akusa sa House Quad Committee hearing ugma, Miyerkules, Nobyembre 13 kalabot sa giingong extra judicial killing sa kampanya sa drug war ubos sa iyang administrasyon.
Mao kini ang gisulti sa kanhi presidente ngadto sa iyang kanhi executive secretary, Salvador Medialdea.
Matod sa tinubdan sa kampo ni Duterte nga nihangyo nga dili nganlan, ang 79 anyos nga kanhi Presidente molupad gikan sa iyang retirement house sa siyudad sa Davao.
Apan, karong Martes, gipahibalo sa Kamara nga kanselado ang hearing nga ipahigayon ugma sa komitiba bisan wala gitumbok sa asembliya ang rason sa pagsuspenso.
Una nang gipadangat sa kampo ni Duterte pinaagi sa iyang abogado nga dili motunga ang kanhi Presidente sa House Quad Committee hearing tungod sa kakuwang sa integridad ug kamatinud-anon sa pipila ka mga magbabalaod nga wala mailhi o nganlan sa kanhi presidente.
Ang abogado ni Duterte niingon usab nga daghang mga testigo ang gipatawag aron motug-an nga duna silay personal nga kaalam sa kalambigitan sa kanhi Presidente sa giingong extra-judicial killings (EJK) niadtong Mayor pa siya sa Davao City ug sa dihang Presidente pa siya.
