METRO MANILA-Gibutyag ni Senator Risa Hontiveros nga high profile ang pugante nga nitago sa giingong balay ni Harry Roque sa Tuba, Benguet.
Niadtong Sabado, gi-raid sa Bureau of Immigration ang usa ka balay sa naasoy’ng lugar diin giingong ang mga occupants kay duha ka Chinese nga person of interest sa Bamban, Tarlac POGO investigation.
Ang usa sa Chinese kay mao si Sun Liming kinsang nalakip sa red notice list sa Interpol tungod sa financial fraud sa China.
Matud ni Presidential Anti Organized Crime Commission (PAOCC) chief Gilbert Cruz nga si Liming usa ka IT expert nga mu-develop og mga application aron maoy gamiton sa scamming operations, gani mao kini IT Manager sa Lucky South 99, ang POGO nga gitabangan ni Roque nga masettle ang utang sa PAGCOR.
Apan, gihimakak ni Roque nga siya maoy tag-iya sa maong balay diin matud pa niini nga ang tag-iya niini kay ang PH2 corporation diin gipanag-iya ang maong korporasyon sa Roque Family ug sa Biancham Holdings and Trading ug gipa-abangan lang kini ngadto kang Wan Yun, usa sa duha ka Chinese nga niukopar niini.
Gibutyag ni Roque nga niadtong Hulyo 31, 2024 lang siya nasayod nga si Wan Yun aduna diay relasyon kang Liming kinsang high profile nga pugante.
Nasayran nga si Liming adunay peke nga passport diin ang paila niini mao si Khuon Moeurn, usa ka Cambodian apan nasakpan ra kini sa Bureau of Immigration.
