CEBU CITY-Gikumpirmar sa Land Transportation and Regulatory Board (LTFRB)-7 nga gitugutan na ang mga public utility jeepneys (PUJs) sa Cebu Province sugod karong adlawa.
Matud ni LTFRB-7 Director Eduardo Montealto sa dihang nahinabi sa Bombo Radyo Cebu atol sa tulumanong Bombohanay sa Udto nga makabiyahe lang ang mga jeepney sa mga barangay roads isip mga “feeders” paingon sa mga bus stops.
Pasabot niini, dili pa mahimong makabahas-bahas ang mga jeep sa mga national roads ug sa mga kasikbit nga kalungsuran.
Dugang pa niini nga kinahanglang sutaon usab sa mga drivers ug mga operators nga makapasar ang ilang mga sakyanan sa Motor Vehicle Inspection System (MVIS) kung “road-worthy” ba kini.
Kinahanglan pa usab nga makakuha og endorsement gikan sa mga local government units aron nga likayan ang pakigkompetensya sa mga traysikel.
Sa pagkakaron, wala pa gitataw sa ahensya kung aduna bay pagsaka sa pletehan sa jeep inay adunay sundon nga standardized nga taripa. | GN
