CEBU – Kritikal ang kahimtang sa usa ka pulis human kini gipusil samtang nisuway og buwag sa away sa Purok Tambis, Barangay Lawis sa amihanang lungsod sa San Remigio, Cebu, sa sayong kaadlawon niadtong Domingo, Disyembre 4, 2022.
Giila ang maong pulis nga si Staff Sergeant Jade Carabuena, 38-anyos nga residente sa maong dapit, gipusil sa likod nga bahin sa ulo.
Wala pa masayod ang kapulisan kon kinsa ang responsable, apan lima ka persons of interest (POIs) ang ilang gitan-aw.
Matud pa ni Major Wendell Abellana, hepe sa San Remigio Police Station,nga si Carabuena mitawag sa ilang hotline mga alas 2 sa kaadlawon aron i-report ang kasamok ug mangayo og backup.
Tungod niini nagpadala dayon sila og mga operatiba sa lugar.
Sa dihang naabtan sa kapolisan ang si Carabuena nga nagkadugo nga nagbuy-od sa yuta 10 ngadto sa 15 metros gikan sa iyang balay.
Matod ni Abellana nga ilang ipaubos sa paraffin test ang lima ka POI aron mailhan kung kinsa ang mibira sa gatilyo.
Sa kasamtangan si Carabuena na-confine sa usa ka pribadong tambalanan sa dakbayan sa Sugbo.
Hinungdan nga nihatag og direktiba si Police Regional Office 7 Regional Director PBGen. Roderick Augustus Alba, sa Hepe sa naasoyng Station nga hugtan ang imbistigasyun arun sa pagsuta kung kinsa ang mga mamumuo niini.
Sa pinakaulahing impormasyon nga nadawat ni Abellana, naa pa ang bala sa ulo sa pulis.
