CEBU CITY-Gipublikar ni Cebu City Councilor James Cuenco ang mga isyu sa giingong kurapsyon nga naglambigit sa dili awtorisadong pag-imprenta ug pagbaligya sa mga Persons with Disability (PWD) identification cards sa Cebu City Hall ngadto sa konseho atol sa regular session gahapong adlawa, Mayo 22, 2024.
Sa iyang privilege speech, niingon kini nga ang mga indibiduwal nga dili angayan sa maong mga benepisyo nakakuha og PWD cards sa kantidad nga P4,000.
Matod niya nga ang mga empleyado nga nalambigit sa pagbaligya sa PWD IDs nga nagkantidad og 4000 pesos kay ubos sa mayors office ubos sa suspendidong mayor nga si Mike Rama.
Dugang pa niini nga mga himsog nga tawo ang mopalit sa maong ID ug ang katuyoan mao ang pag-avail sa 20 porsiyento nga diskwento sa mga tindahan, botika, restaurant ug uban pa.
Gibutyag usab sa konsehal nga daghan na ang namalit og PWD IDs gani adunay mga artista nga nipalit niini bisan og wala silay deperensya.
Subay niini, iyang ipatawag ang mga empleyado sa Cebu City Hall nga nalambigit sa pagbaligya aron tubagon ang maong akusasyon.
Kung mapamatud-an nga nalambigit sila sa pagbaligya sa PWD ID sa kantidad nga 4000 pesos, mahimo kining mapasakaan og kaso ug matak-tak ang ilang trabaho.
