CENTRAL VISAYAS- Malampusong nakuha sa Region VII (Central Visayas) ang ikaupat nga puwesto sa kinatibuk-ang medal tally human makasakmit og 32 ka gold, 30 ka silver, ug 44 ka bronze nga adunay kinatibuk-ang 106 ka medalya sa pagtapos sa Palarong Pambansa 2026.
Samtang, lig-on gihapong gihuptan sa National Capital Region (NCR) ang liderato human makuha ang unang puwesto sa medal tally.
Sa kasamtangan, mitala ang NCR og kinatibuk-ang 233 ka medalya, nga gilangkuban sa 91 ka gold, 71 ka silver, ug 71 ka bronze.
Gisundan kini sa CALABARZON nga anaa sa ikaduhang puwesto nga adunay 165 ka medalya (55 gold, 50 silver, ug 60 bronze).
Samtang ang Region XI (Davao Region) anaa sa ikatulong puwesto human makakuha og 34 ka gold, 32 ka silver, ug 34 ka bronze, alang sa kinatibuk-ang 100 ka medalya.
Anaa sa ikaupat nga puwesto ang Region VII (Central Visayas) nga adunay 32 ka gold, 30 ka silver, ug 44 ka bronze (kinatibuk-ang 106 ka medalya), samtang ang Region VI (Western Visayas) nahimutang sa ikalimang puwesto nga adunay 31 ka gold, 36 ka silver, ug 45 ka bronze (kinatibuk-ang 112 ka medalya).
Mas ubos ang pwesto sa Region VII ug VI tandi sa Region XI bisan mas daghan ang ilang kinatibuk-ang medalya, tungod kay ang opisyal nga ranggo gibase man sa gidaghanon sa nakuhang bulawan o gold medals.
