Niabot sa 257 gikan sa 318 ka mga magbabalaod ang misuporta sa mosyon aron ipadala ang Articles of Impeachment batok kang Vice President Sara Duterte ngadto sa Senado.
Kini nga gidaghanon milabaw pa sa gikinahanglan sa Konstitusyon ug mas daghan itandi sa 240 ka mga boto sa iyang miaging impeachment, ug 26 lamang ka mga magbabalaod ang misupak niini, samtang 9 ang nag-abstain.
Subay niini, eksklusibong gikab-ot sa Bombo Radyo Cebu news team si Akbayan Partylist Representative Percival “Percy” Cendaña, aron sutaon kung unsa ang iyahang pamahayag kabahin na sa kalamboan sa Impeachment complaint batok sa bise presidente.
Matod ni Cendaña, gilaoman na niya nga moabot sa ⅓ aron hingpit nga mapadala sa senado ang Articles of Impeachment. Apan, gidugang niya, nga sa overwhelming majority nga miuyon sa pagduso sa reklamo ngadto sa senado, gikalipay niya nga mao kini ang nahimong resulta, bisan paman o taliwala sa mga hulga nga nadawat sa mga kongresista sa milabayng semana.
Gihimug-atan usab ni Cendaña ang importansya sa 257 nga mipabor sa pagpadala sa maong reklamo ngadto sa Senado tungod kay angayan lang nga patubagon ug moatubang ang usa ka indbidwal nga nang-abuso sa gahom nga gihuptan, nangawkaw sa nasudnong panudlanan, ug nanglimbong sa katawhan.
Ingun man nga subling gitataw niini nga taliwala sa mga hulga nga gihimo sa bise presidente, basta lig-on lang ang ebidensya, walay gahom kini ilabi na nga ikaduhang higayon na kini nga gi-atubang sa bise presidente ang reklamo, butang nga maghatag og sumbanan nga impeachable gayud kini.
Samtang, sa unod sa gipamahayag ni Batangas Rep. Leandro Leviste, nag-ingun kini nga adunay bayranay nga nahitabo, kantidad nga 20 milyones pesos, sa mga mibotar-pabor sa impeachment batok sa bise presidente.
Apan, gilimod kini ni Cendaña ug gitino nga kini klaro nga usa ka black propaganda ug klarong pagpangguba sa proseso sa impeachment.
Dugang ni Cendaña, bisan paman sa gisaysay ni Leviste, wala gani kini maka-presentar og ebidensya nga maghatag og kamatuoran sa giyagyag nga pamahayag niini.
Hinungdan nga ligdong ang baruganan ni Cendaña tungod kay strikto kining nisunod sa sa konstistusyon, rules of impeachment ug ingun man sa desisyon sa Korte Suprema, hinungdan nga mikab-ot nalang kini sa desisyon nga magpakatap nalang og walay kamatuoran nga balita.
Sa pikas bahin, giangkon usab ni Cendaña nga ang kalit nga pagbalik ni Senador dela Rosa sa Senado, ug ang bag-ong Senate President sa kasamtangan, kini gumikan kay matod pa niya, nasayud ang kadaghanan nga ang bag-ong Senate President nga si Alan Cayetano, kaalyado ni VP Duterte.
Samtang sa habig usab sa kalit nga pagtumaw ni Sen. dela Rosa sa Senado, gibarugan ni Cendaña nga sa susamang kalidad sa Senador, dili kini “deserve” sa katawhan—kinsa mipakita lang aron ipatuboy ang gipaboran ang kaalyado niini apan kung hisgutanan na sa obligasyon, walay maskin anino nga nipakita.
