Nipasalig ang Malacañang sa publiko nga ang mga serbisyo sa gobyerno ug nagpadayon nga mga proyekto, dili mabalda sa halapad nga direktiba ni Presidente Ferdinand R. Marcos Jr. alang sa tanang mga kalihim sa gabinete sa pagsumite sa ilang courtesy resignation, bisan pa nga giklaro niini nga walay piho nga opisyal ang gipili sa proseso.
Si Presidential Communications Office (PCO) Undersecretary Claire Castro miingon nga ang direktiba, nga gitumong sa pag-recalibrate sa mga prayoridad sa administrasyon, dili makapahunong o makalangan sa mga operasyon sa gobyerno.
Giklaro ni Castro nga dili maapektuhan ang mga pending ug existing projects sa panahon sa transisyon, ug padayon ra gihapon ang pagtatrabaho sa mga Cabinet secretaries ug mga tawo sa gobyerno sa ilang matag katungdanan.
Dugang niya, ang mga miyembro sa gabinete magpabilin sa ilang mga katungdanan gawas kung pormal nga dawaton sa Presidente ang ilang mga resignation, aron masiguro ang padayon nga pagpangulo ug mga operasyon.
Gipanghimakak usab sa opisyal sa Palasyo subay sa mga pangagpas nga ang maong lakang gituyo aron sa hilom nga pagtangtang sa pipila ka mga opisyal.
Ang mass filing nag-gumikan sa usa ka direktiba nga unang gipasabot ni Marcos sa iyang “BBM Podcast” nga gipagawas niadtong Lunes, diin iyang gipahibalo ang nagpadayon nga ebalwasyon sa performance sa iyang Gabinete.(Bombo Irene Ardiente)
