Nagpabuto og warning shot ang usa ka Russian warship duol sa usa ka UK-flagged yacht sa English Channel.
Nahitabo ang insidente niadtong Martes, Hunyo 16.
Gikatahong nalambigit sa insidente ang yate nga narehistro sa UK nga ginganlan og Bright Future ug ang Russian frigate nga Admiral Grigorovich.
Sumala sa Russian Ministry of Defense, ang yate giingong mihimo og “delikado nga pagduol” paingon sa ilang barko sa baga nga gabon.
Human giingong wala mobalhin og direksyon ang yate ug miduol sa gilay-on nga wala pay 500 feet, ang kumander sa barkong panggubatan sa Russia nagpabuto og mga warning shot gikan sa gagmay nga mga armas aron malikayan ang bangga.
Hinuon wala nakaangkon og samad ang magtiayong British ug wala’y kadaot nga nahiaguman ang naasoy nga yate.
Gikumpirmar sa UK Ministry of Defence (MoD) nga giimbestigahan niini ang insidente. Gipasabot niini nga ang mga buto wala gitumong direkta sa yate apan usa lamang ka pasidaan aron malikayan ang posible nga bangga.
Samtang, bisan kung giisip sa MoD nga kini usa ka nahimulag nga insidente, nakahatag kini og kabalaka tungod kay kini nahitabo duha ka adlaw human nasakpan ug nadakpan sa militar sa UK ang usa ka oil tanker nga kabahin sa “shadow fleet” sa Russia sa parehas nga rehiyon.
