CEBU CITY-Hingpit na nga andam ang mga sakop sa kapulisan sa Sugbo alang sa umaabot nga Semana Santa 2024 pinaagi sa ilang giandam nga Security Plan.
Mao kini ang gibutyag ni City Director Police Colonel Ireneo B. Dalogdog sa Cebu City Police Office sa pakighinabi sa Bombo Radyo Cebu.
Diin mipasalig kini nga hugot ang ilang seguridad nga ipakatap arun sa pagmintar sa kahapsay ug kalinaw sa dakbayan hilabi na sa mga simbahan nga gilauman nga dagsaan sa liboan ka mga tawo.
Sa pikas bahin, gipaambit usab sa opisyal nga dako ang kalipay ni Police BGen. Anthony Aberin, ang Regional Director sa Police Regional Office 7 sa sunod-sunod nga mga kalampusan nga mga operasyon lakip na ang mga dagkong mga accomplishment nga ilang nakab-ot.
Hinungdan nga dako ang iyang pasalamat sa wala’y puas nga paggiya sa tanang kapulisan, ingon man sa publiko nga nagpabilin nga misalig sa ilang sakop ug agi’g tubag mipasalig usab kini nga magpadayon ang ilang pakigbatok sa tanang krimen arun mamintinar ang kahapsay ug kalinaw sa syudad.
Gawas sa mga naasoy nga gipasalamat, gihatagan usab niini ug pasalamat sa lokal nga kagamhanan nga gipangulohan sa mayor sa dakbayan nga si Mayor Michael Rama sa paghatag og suporta ug salig sa mga kapulisan.
