TOLEDO CITY,CEBU- Hilabihang kalipay ang mipatigbabaw sa tibuok Tribu Masadyaon sa Toledo City human nila malabni ang kampiyonato sa Sinulog Ritual Showdown 2026 (Free Interpretation Category), kagahapon, Enero 18, didto sa Cebu City Sports Complex, nga naghatag og dakong garbo sa ilang dakbayan.
Sa pakighinabi sa Bombo Newsteam kang Gypsy Rhy Goc-ong, ang choreographer sa maong tribu, iyang gipaambit nga nagbunga ang tanang sakripisyo ug kinasing-kasing nga pagpangandam sa tibuok grupo.
Tungod sa ilang de-kalidad nga pasundayag, nakuha nila ang titulong Kampeon sa Best in Ritual Showdown – Free Interpretation Category ug bitbit ang engrandeng premyo nga ₱3 milyon.
Gisaysay ni Goc-ong nga ang matag lihok sa ilang sayaw ug matag ampo nga ilang gilitok, gihalad gayod ngadto sa Balaang Bata, ang Senior Santo Niño.
Mapasalamaton usab siya sa walay hupas nga suporta sa katawhan ug kagamhanan sa Toledo City nga nahimong yawe sa ilang kalamposan.
Sumala pa niya, dul-an sa duha ka bulan ang ilang gigahin sa hugot nga praktis, gikan sa pagmugna sa choreography, paghimo og dambuhalang mga props, pagtahi sa mabulukon nga costumes, hangtod sa ilang “final performance” sa entablado.
Tumong sa Tribu Masadyaon nga ipakita sa kalibutan nga pinaagi sa lig-on nga pagtuo ug tiunay nga gugma, makab-ot sa katawhan ang kahiusahan ug kalinaw.
Sa pagkakaron, nagpabilin ang hudayaka sa Toledo City samtang gisaulog ang makasaysayanong kadaugan nga nagpakita sa talento ug debosyon sa mga Toledano.
