Mitumaw ang pangalan sa negosyanteng nakabase sa Davao nga si Samuel “Sammy” Uy atol sa nagpadayon nga impeachment trial ni Vice President Sara Duterte, kalabot sa usa ka manager’s check nga nagkantidad og P16 ka milyon.
Gikumpirma ni Marwin Galvez, usa ka saksi gikan sa Bank of the Philippine Islands (BPI), nga si Uy ang gitudlo nga payee sa maong manager’s check, nga adunay petsa nga Mayo 30, 2016.
Gipresentar ni Galvez ang rekord sa maong tseke isip kabahin sa mga dokumentong pinansyal nga gisumite sa prosekusyon ngadto sa impeachment court sa Senado.
Si Uy usa ka negosyante nga nakabase sa Davao ug nalambigit sa pamilyang Duterte sa mga alegasyon nga gihisgutan atol sa mga proseso sa impeachment.
Samtang, angay hinumdoman nga ang ngalan ni Uy migawas na kaniadto uban sa mga alegasyon nga naghatag siya og minilyon nga pondo ngadto sa pipila ka mga miyembro sa pamilyang Duterte.
