CEBU CITY- Gitino sa usa ka Human Rights Lawyer nga ang sayong pagdeklara ni Vice President Sara Duterte nga modagan sa 2028 presidential elections,posibleng mahimong distraksyon sa mas dagkong isyu sa nasod.
Sa pakighinabi sa Bombo News Team, si Atty. Neri Colmenares miingon nga bisan tuod aduna’y katungod si VP Duterte nga ipahibalo ang iyang plano sa pagdagan, dili husto ang timing niini, ilabi na nga daghan pa kaayong problema ang giatubang sa gobyerno karon.
Gidugang pa ni Atty. Colmenares nga gipanglantawan na nila nga modagan si Duterte sa 2028, apan nakurat sila sa ka-sayo sa pagdeklara, labi na nga kini nagpasabot nga mas musulod siya sa pulitika, lakip na ang paglibot ug pakigkita sa mga mayor ug lokal nga lider.
Gipangutana usab sa abugado kung unsaon pag-fulfill sa iyang responsibilidad isip Vice President kon sayo pa lang nag-andam na sa kampanya.
Samtang, bahin sa posibleng implikasyon niini sa hisgutanan sa impeachment nga ginahisgutan karon sa lower house, giingon sa abugado nga kinahangkang walay epekto ang maong deklarasyon.
Matud niya, ang desisyon sa House ug sa Senado sa impeachment kinahanglan ibase sa merito sa kaso ug interes sa katawhan, ug ang mga impeachable officials dili angay ikonsiderar nga untouchable, kondili kinahanglan manubag kung adunay basehan.
