Gibasura sa Korte Suprema ang petisyon nga gisang-at ni Cassandra Li Ong batok sa Senate ug House of Representatives committees nga nagpahigayon og imbestigasyon sa mga anomaliya sa Philippine Offshore Gaming Operators (POGOs).
Base sa desisyon nga gipirmahan ni Associate Justice Jhosep Lopez. ang Korte Suprema (SC) miila sa gahom sa Kongreso sa pagpahigayon og hearing in aid of legislation.
Si Ong nalambigit sa operasyon sa Lucky South 99 sa Porac, Pampanga nga gironda sa mga awtoridad tungod sa ilegal nga operasyon niini.
Basi sa iyang petisyon, nipasangil si Ong nga gilapas sa Kongreso ang iyang katungod nga magpakahilom ug katungod batok sa self-incrimination.
Dugang pa, nga giakusahan usab niini ang House QuadComm nga nag-abuso sa gahum niini ug milapas sa hurisdiksyon niini sa pagpahigayon sa imbestigasyon pinaagi sa pagpugos kaniya sa paghatag impormasyon.
Giklaro sa SC nga ang legislative power sa Kongreso nalatid sa 1987 Constitution, busa walay nakitang kalapasan.
Si Ong ug uban pa nag-atubang og kasong qualified human trafficking nga gipasaka niadtong Abril.
