Personal nga mibisita si Department of Education Secretary Sonny Angara sa Banga National High School sa South Cotabato gahapon, Setyembre 19, human sa trahedya sa pagpamusil sa maong tunghaan, aron pangunahan ang dinaliang mga lakang ug maghatag og tabang sa mga apektadong pamilya ug mga kawani.
Nakigtagbo si Angara sa mga kawani, ginikanan, ug lokal nga opisyal aron i-coordinate ang emergency response, maghatag og psychosocial services, ug tukion ang seguridad.
Gisusi usab niya ang tunghaan, mitambong sa security briefing, mibisita sa haya sa mga biktima, ug gihupay ang mga naangol sa ospital.
Gihatagan ni Angara og gibug-aton ang panginahanglan sa hugot nga seguridad ug mental health interventions.
Nanawagan ang DepEd og dugang tabang gikan sa mga barangay opisyal ug tanod sa pagpapatrolya, ilabina sa mga tunghaan nga walay security guards, aron mapugngan ang susamang mga insidente sa umaabot.
