Kusgnaong gibarugan ni Department of Public Works and Highways (DPWH) Sec. Manuel Bonoan nga wala siya makabenepisyo o makaginansya sa mga gibutyag nga ghost projects sa nasud.
Matod sa kalihim, wala siyay labot sa nasangpit nga mga proyekto, ug wala usab siyay relasyon sa mga opisyal sa DPWH nga nipatuman niini, apil na ang mga kontraktor.
Unang gibutyag ang mga ghost project sa Baliuag, Bulacan, human si Pang. Ferdinand Marcos Jr., nihimo og inspeksyon.
Ang nasangpit nga proyekto adunay deskripsyon nga ‘Construction of Reinforced Concrete River Wall’ ug adunay actual address sa Purok 4, Barangay Piel, Baliuag, Bulacan.
Bisan tuod gipondohan kini og P60M ubos sa 2025 National Budget, ang gasto sa kontrata sa midaog nga kontraktor nga nagkantidad og kinatibuk-ang P55,730,911.60.
Gitugyan kini sa Syms Construction Trading samtang gipatuman sa Bulacan 1st District Engineering Office ang nasangpit nga proyekto.
Gawas sa nasangpit nga proyekto, daghang mga flood control projects sa nasangpit nga probinsya ang gitawag karon nga ghost projects.
Apan si Sec. Bonoan, gitataw nga gisusi na sa DPWH ang nahisgutang mga proyekto ug pahamtangan og silot ang bisan kinsa nga mapamatud-ang responsable o nakabenepisyo niini.
Matod sa kalihim, daghang mga district engineers nga nasuta nga responsable sa nasangpit nga isyu ang gipaubos sa preventive suspension samtang nagpadayon ang imbestigasyon.
