CEBU CITY-Self-defense ang tubag ni David Chua Lim Jr. kinsang suspect sa pagpusil sa usa ka nurse nga nakuhaan pa og video niadtong Domingo sa buntag. Kini human nga mi-surrender si Lim ganihang alas 2 sa kaadlawon sa Police Regional Office-7 nga gi-escortan pa sa Special Action Force (SAF).
Matud ni Lim nga dili tinood nga nagzig-sag ang iyang dagan sa iyang sakyanan gani ang biktima nga maoy nagsunod kaniya mao ang nagsige og bosina sa makadaghan nga highayon hinungdan nga iya kining gina-og. Giingon usab ni Lim nga aduna pay nahitabo nga sumbagay apan matud niya nga daghan og kauban ang biktima mao nga iya kining gipabuthan. Gihimug-atan niya nga nakahibalo ang biktima sa tinood nga nahitabo ug kung adunay complete video mas maayo nga mapakita usab.
Gipasakaan og kaso nga frustrated murder ug illegal possesion of ammonitions si David Lim Jr. tungod kay nasayran nga walay licensya ang iyang pusil. E-detain Si Lim sa Cebu City Police Office kung dili kini makapyansa.
Samtang mi-alma si Cebu City Mayor Tomas Osmeña tungod sa giingong special treatment nga gipakita sa pulis ngadto kang David.
Matud ni Osmeña nga dili pwedeng tagaan og special treatment si Lim nga gitawag pa niya og spoiled brat. Gihimug-atan niya nga dili usab maka-angayon ang nahitabo nga pagsurrender ni Lim ilabina kay gipatambay pa kini sa opisina sa Director sa Police Regional Office.
Dugang pa sa Mayor nga bisan og anak ka pa og datu kinahanglan nga patas pag-abot sa balud kung adunay kay nahimo nga sala aron na usab nga magsilbi kini nga mensahe sa mga anak sa datu./
Gitino usab ni Osmeña nga humana ang iyang trabaho isip Mayor gumikan kay nasikop naman si Lim ug dili na kinahanglan nga mu-adto pa siya a police station aron magpa-papel.
