Pormal nga napili si Senador Alan Peter Cayetano isip bag-ong Presidente sa Senado sa usa ka botohan nga gihimo atol sa plenary session sa Senado niadtong Lunes, Mayo 11.
Sa kinatibuk-ang 24 ka mga senador nga mitambong sa sesyon, si Cayetano nakakuha og 13 ka boto, igo na aron mapildi si Senador Vicente “Tito” Sotto III nga nakakuha og 9 ka boto.
Lakip sa mga mibotar pabor kang Cayetano, gawas sa iyang siyam ka mga kauban sa Minority bloc, mao ang iyang igsoon nga si Sen. Pia Cayetano ug mga igsoon nga sila si Sen. Camille ug Mark Villar.
Samtang ang siyam ka mga Senador nga mibotar kang Sen. Sotto mao sila si Sen. Bam Aquino, Win Gatchalian, Risa Hontiveros, Panfilo Lacson, Lito Lapid, Kiko Pangilinan, Raffy Tulfo, Erwin Tulfo ug Tito Sotto.
Duha ka mga senador ang nakahukom nga mo-abstain lakip na sila si Sen. JV Eqjercito ug Sen. Juan Miguel Zubiri.
Subay niini, si Cayetano ang ikaupat nga lider sa Senado ubos sa administrasyong Marcos. Mahinumduman nga si Sen. Juan Miguel Zubiri nagsilbi nga Presidente sa Senado sa pagsugod sa administrasyon, gisundan ni Sen. Francis “Chiz” Escudero niadtong 2024, ug Sen. Tito Sotto niadtong 2025.
Ang miting nahitabo taliwala sa mainit nga debate bahin sa Articles of Impeachment batok kang Bise Presidente Sara Duterte, diin ang reklamo gilauman nga ipadala sa Senado alang sa usa ka hingpit nga impeachment trial kung makakuha kini sa gikinahanglan nga 1/3 nga boto gikan sa Ubos Balay Balauranan.
