METRO MANILA-Nipasalig si Senate Committee on Women chairperson Risa Hontiveros nga mangayo sila og tabang sa mga law enforcement agencies sa ubang kanasuran kon ugaling wala na sa Pilipinas ang gisuspenso nga Bamban, Tarlac Mayor Alice Guo.
Kini nga pamahayag sa senadora nunot sa pakyas nga pagdakop kang Guo tungod kay wala kini makit-i sa Senate Sergeant-at-Arms sa iyang umahan sa Bamban, Tarlac ning semanaha.
Gipasabot ni Hontiveros, aduna silay koordinasyon sa ubang kanasuran nga nagsusi usab sa mga krimen nga nalambigit sa operasyon sa POGO dinhi sa nasud.
Apan masaligon gihapon ang magbabalaod nga anaa pa sa Pilipinas si Guo.
Hinungdan nga giawhag ang suspendidong mayor nga sundon ang tambag sa iyang mga abogado nga mo-surrender o modawat sa mando sa pagdakop sa Senado.
