Gipasalig ni Senador Risa Hontiveros nga adunay suporta ang Taiwan gikan sa Pilipinas.
Taliwa kini sa tulo ka adlaw nga military drill sa China sa palibot sa Taiwan human nanumpa ang bag-ong Presidente sa Taiwan nga si Lai Ching-te sa miaging semana.
Giinsister ni Hontiveros nga, sama sa bisan unsang gawasnon ug demokratikong katawhan, ang mga Taiwanese adunay katungod sa pagpili sa ilang mga lider ug pagpili sa ilang mga representante.
Hinungdan nga mipadayag si Hontiveros og pasalig ngadto sa bag-ong Taiwanese President nga si Lai Ching-te nga aduna kini kaalyado sa Pilipinas.
Nanghinaot usab ang senador nga ang international community mobarog ug mosuporta sa Taiwan taliwala sa gihimo sa China.
Ingon man nga nanawagan usab kini sa China nga hunongon na ang pagpakitag puwersa sa palibot sa Taiwan ug sa tibuok South China Sea.
Ug miingon nga dili solusyon ang militarisasyon sa South China Sea ug kinahanglan nga makigtambayayong ang Beijing sa mga gobyerno sa mga nasud sa palibot sa South China Sea aron mahupay ang tensyon sa rehiyon.
