MANDAUE CITY– Dili makalimtan ni Editha Fanlo Cortes, Taga Manduae Inc. (TMI) ug Kaabag Foundation Presidente, ang iyahang kasinati-an sulod sa J Center Mall sa dakbayan sa Mandaue sa dihang adunay nahitabo nga pagpanulis kagabii.
Atol sa pakighinabi sa Bombo Radyo Cebu atol sa ‘Goodmorning Philippines Program’ ni Cortes kinsang mipasabot kini kalabot sa ilang kawsa, gipaambit usab niini ang iyang kasinatian.
Matud pa nga kauban niini ang iyahang anak ug mga apo sa dihang nanihapon sulod sa nahisgutang mall ug aduna pa sila’y plano nga manan-aw ug sine sa dihang nahitabo ang komosyon.
Sigon ni Cortes nga samtang sila nanihapon nakadungog kini ug usa ka boto diin giingung susamang nahagbong nga tray ang tingug ug dayun nakita na lang nila ang nagdinaganay nga mga tawu.
Sigon pa nga dili mahulagway ang gibati niini nga kahadluk sa iyahang nasaksihan kung diin kini naghunahuna nga adunay mass shooting nga nahitabo.Dugang pa ni Cortes nga mas labaw kining nahadluk para sa iyahang mga apo kinsang nanghilak na usab niadtung higayuna.
Giingung gipasulod sila sa gwardya sa movie house ug didto daghan sila nga nagpundok hangtud nga mi-abut ang Special Weapon And Tactics (SWAT) Team nga mao na ang migiya sa mga tawu pagawas sa mall.
Gituhu-an ni Cortes nga boto gayud sa armas ang ilahang nadungog sukwahi sa pamahayag ni Police Colonel Jonathan Abella, ang director sa MCPO, nga walay pagpaboto sa armas nga nahitabo.
Nagkanayon pa si Cortes nga nakita niini nga walay armas ang mga gwardya sa nahisgutang mall. (SBR)
