CEBU CITY — Patay ang usa ka 64-anyos nga lalaki human gi-atake sa iyang kasingkasing samtang nagromansa sa giingong kabit niini sa Brgy. Poblacion lungsod sa Compostela, Cebu.
Giila ang biktima nga si Inocencio Cabahug, minyo, usa ka retired government employee, ug nagpuyo sa Brgy. Jugan lungsod sa Consolacion.
Matud sa hepe sa Compostela PNP nga si PCapt. Vincent Zozobrado, nga nagcheck-in ang maong senior citizen kauban ang 28-anyos nga babayeng “lover” sa usa ka beach resort sa naasoy nga lungsod.
Gisaysay ni Zozobrado nga sa dihang nanginit ug naghinam ang duha sa ilang romansa, kalit lang nga mi-atake ang senior citizen ug natumba.
Daling nangayo og tabang ang “lover” ug daling gidala sa tambalanan ang biktima apan namatay kini ug gideklarar nga dead on arrival.
Sumala pa sa nahipos nilang medical bulletin nga namatay si Cabahug gumikan sa heart attack ug daan nang adunay problema sa iyang kasingkasing.
Gi-atiman na karon sa pamilya ang patay’ng lawas sa senior citizen samtang hilabihang na-shock ang “lover” sa maong panghitabo human nga wala nahinayon ang pagsawo sa ilang gugma.
