Nagbangutan ang football community sa Spain human sa pagkamatay sa CD Tenerife striker nga si Jesus de Miguel, 30 anyos, human makasinati og cardiac arrest atol sa ilang duwa batok sa FC Andorra.
Sumala sa mga taho, nahitabo ang insidente dihang nagbangga si De Miguel ug ang goalkeeper nga si Jesús Owono, nga migawas sa iyang penalty area aron sa pagsalo sa bola.
Naigo sa tuhod sa goalkeeper ang dughan sa striker, hinungdan nga natumba kini ug nawad-an sa panimuot taliwala sa duwa.
Gihatagan dayon si De Miguel og medical team sulod mismo sa football pitch sa wala pa siya gidala sa ospital.
Apan, bisan pa sa mga paningkamot sa medical team, wala siya maluwas.
Gikumpirma sa iyang club nga CD Tenerife ang iyang pagpanaw niadtong Martes.
Isip pagtahod sa namatay nga magdudula, gipahibalo sa Spanish Football Federation ang pag-postpone sa tanang duwa nga nakaeskedyul unta niadtong Martes tungod sa maong trahedya.
Miapil si De Miguel sa CD Tenerife sa wala pa magsugod ang 2025–2026 season.
Sa miaging season, nakarehistro siya og 11 ka mga goal, nga nagpamatuod sa iyang kontribusyon sa koponan.
