PROVINCE OF CEBU-Gipaabot nga mo-isyu special permit si Gov. Gwendolyn Garcia sa umaabot nga mga adlaw aron hawanan ang mga suba sa Mangitngit ug Luyang sa lungsod sa Carmen ug aron mapadako ang produksiyon sa tubig.
Kini nga mga suba nagsuplay og 35 milyones ka litro nga tubig matag adlaw sa Metro Cebu pinaagi sa Metropolitan Cebu Water District (MCWD) apan niabot sa gobernador ang taho nga ang Luyang River mihubas tungod sa El Niño ug posibleng mokunhod ang suplay niini sa umaabot nga mga semana.
Sa pakigtagbo nila ni Engr. Mary Ann Bueno sa Environmental Management Bureau (EMB), nasayran sa gobernador nga ang mga sapa sa Carmen makahimo gihapon sa paghatod sa gilauman nga 35 MLD, apan tungod sa dugay nga huwaw, kinahanglang himoon ang mga lakang aron mapadako ang produksiyon sa tubig.
Pinaagi sa paghawan sa mga babag sa suba sama sa mga bato ug pino nga balas, yuta, o lapok nga madala sa suba, ang tubig mahimong mas gawasnon nga modagayday ug ang mga stagnant nga linaw kinahanglang likayan.
Sa pag-isyu sa special permit, gihatagan og gibug-aton ni Garcia ang panginahanglan sa pagpanalipod sa rivers’ ecosystem samtang gipauswag ang ilang kapasidad sa pagsuplay og tubig sa komunidad.
Ang espesyal nga permiso nga i-isyu adunay mga panudlo aron masiguro nga ang proseso sa desilting gihimo sa usa ka paagi nga mahigalaon sa kinaiyahan.
