SPED Athlete gikan sa Dumaguete City, nagtinguha nga makakuha pagbalik og bulawang medalya sa CVIRAA 2024

CENTRAL VISAYAS-Makatandog nga istorya ang gipaambit sa usa ka atleta gikan sa Dumaguete City nga usa ka SPED athlete diin usa kini sa mga partisipante sa Central Visayas Regional Athletics Association Meet o CVIRAA 2024.

Diin wala nahimong babag ang kawad-on sa panan-aw ni Christian Niño Rola nga makahatag og inspirasyon sa uban nga bisan dili kini makakita, wala kini nawad-i og paglaum nga makab-ot ang mga kalampusan sama nalang sa pagsakmit pagbalik sa bulawang medalya karong CVIRAA 2024.

Niadtong CVIRAA 2023, usa si Rola nga mihatag og mga bulawang medalya sa Dumaguete City diin mao ang ikaduha sa Cebu City nga adunay daghang medalya nga nalangkat.

Nasayran nga dili lang usa, duha, apan tulo ka duwa ang salmutan niini nga mao ang standing long jump, Shot put, ug 100 meter dash.

Gawas sa tinguha nga makakuha pagbalik og medalya, gipaambit usab ni Christian ang iyang gugma sa sports sukad niadtong Grade 1 student hangtud nag-Grade 10 na kini.

Ingon man nga ang iyang nahimong inspirasyon sa pagpadayon ang iyang iyaan nga mao’y nagpadako kaniya sukad nga mitaliwan na ang iyang inahan niadtong nag-edad kini og 6-anyos.