Gipanglantawan nga sundon sa Senado ang mga legal nga pamaagi nga gipatuman sa impeachment trial ni kanhi Chief Justice Renato Corona niadtong 2012 kon ugaling mo-isyu kini og subpoena alang sa mga rekord sa buhis ni Bise Presidente Sara Duterte.
Kini ang gipahayag ni Atty. Regie Tongol, ang tigpamaba sa Senate impeachment court.
Sa usa ka press conference, gipahibalo ni Tongol nga giaprobahan na sa impeachment court ang hangyo sa House prosecution panel alang sa pagpapagawas og subpoena duces tecum ug subpoena ad testificandum batok sa mga opisyal sa Land Bank of the Philippines.
Tumong niini nga makuha ang mga dokumento nga may kalabotan sa Article I sa impeachment complaint, nga nagtuki sa giingong sayop nga paggamit o pag-abuso sa confidential funds.
Tungod kay ang subpoena i-isyu pinaagi sa ex parte proceedings (mga lakang nga gihimo alang sa usa ka habig lamang), gihayag sa habig sa depensa nga wala silay nakitang rason aron babagan ang pagpapagawas niini sa pagkakaron.
Bisan pa man niana, ang kampo sa Bise Presidente aduna gihapoy katungod nga mosupak sa maong subpoena sa higayon nga ipresentar na ang mga ebidensya, pag-file sa mga dokumento, o atol sa pagpangutana sa mga saksi.
Giklaro usab ni Tongol nga mas komplikado ang legal nga dagan kung ang pangayoon mao ang mga rekord sa bangko, tax records gikan sa Bureau of Internal Revenue (BIR), o mga report gikan sa Anti-Money Laundering Council (AMLC).
Kini tungod kay ang maong mga dokumento nasakop sa nagkalain-laing strikto nga balaod sama sa bank secrecy, taxpayer confidentiality, ug data privacy.
Sa pikas bahin, nagkabahin ang opinyon sa mga legal expert kung pwede ba nga kwestyonon sa Korte Suprema ang subpoena nga gi-isyu sa impeachment court.
Ang ubang mga eksperto nagkanayon nga tungod kay ang Senado adunay eksklusibong gahum ubos sa Konstitusyon sa pagdungog ug paghukom sa mga kaso sa impeachment, dili basta-basta makapanghilabot ang Korte Suprema sa mga interlocutory order o temporaryong kamandoan niini.
