PROVINCE OF CEBU-Napasar na isip ordinansa sa Sangguniang Panlalawigan sa kagamhanang probinsya sa Sugbo ang programang panginabuhi nga Sugbo Negosyo atol sa regular session sa kapitolyo.
Kahinumduman nga unang gisang-at ang maong ordinansa sa iyang unang pagbasa niadtong Hunyo 24, 2024 diin sugyot sa pag-author ni Cebu 6th District Board Member Glenn Anthony Soco, ang chairman sa committee on commerce and industry sa Cebu Provincial Board sa Kapitolyo sa Sugbo.
Tumong sa maong programa ang pagpaabot og hinabang pinansyal sa mga patigayon sa tibuok lalawigan ug mga mentorship lessons sa mga small and micro-entrepreneurs isip dugang pundasyon sa ilang panginabuhi.
Unang gilusad ang maong programa niadtong Nobyembre 2021 atol sa pandemya diin mikabat ang pundo sa P100-milyones matag tuig og idalit pinaagi sa QR-coded cards nga magamit sa mga benepisyaryo sa paglukat og pre-approved nga mga butang sa mga tindahan gikan sa Kapitolyo.
Sa pakighinabi sa Bombo Radyo Cebu kang Board Member Glenn Soco gipaambit niini nga daghan na ka mga gagmay nga magmamatigayon nga mokabat sa kapin 20 milyones ang natabangan ning sa ikatulong season.
