-- ADVERTISEMENT --

Gipatuman sa Iran ang rotational blackout sugod gahapong adlawa, Nobyembre 22, human sa kadaot sa pangunang imprastraktura sa kuryente sa nasud sa nagpadayon nga panagbangi sa Middle East.

Sumala sa pangu sa nasudnong kompanya sa kuryente sa Iran, si Mohammad Allahdad, ang sektor napugos sa paglimita sa konsumo niini tungod sa ubos nga suplay sa lana sa nasud.

“Given the country’s fuel supply conditions, the electricity sector will be forced to impose distribution restrictions from Sunday,” ingon ni Allahdad.

Dugang pa niini nga ang mga pagkawala sa kuryente gilauman nga molungtad og duha ka oras matag duha ka adlaw, depende sa lugar o rehiyon.

Ang gisugyot nga power rationing nahitabo human sa hiniusa nga pag-atake sa US ug Israel sa imprastraktura sa enerhiya sa nasud — usa ka lakang nga labi nga nagpalala sa huyang na nga suplay sa lana sa nasud nga gipahinabo sa nagpadayon nga panagbangi tali sa duha ka estado.

-- ADVERTISEMENT --

“The attack on the country’s gas infrastructure has aggravated the situation, and we should therefore expect difficulties this winter,” ingon ni Iranian President Masoud Pezeshkian.

Bisan tuod nailhan ang Iran sa kinaiyanhong kahinguhaan niini nga lana ug natural nga gas, dugay na kining naglisod sa pagtubag sa mga panginahanglanon sa kuryente ug enerhiya sa nasud.