Nagkatigom pag-usab ang pipila ka mga tigpaluyo ni Bise Presidente Sara Duterte sa Quezon City Regional Trial Court gahapon sa buntag, Biyernes aron ipakita ang ilang suporta kaniya taliwala sa kasong “grave threats” nga iyang giatubang.
Ang pipila kanila nagdala og mga litrato sa Bise Presidente aron ipadayag ang ilang pagpaluyo nga orihinal nga gitakda alang sa iyang “arraignment”—ang pormal nga pagbasa sa mga kasong gipasaka batok kaniya.
May kalabotan niini, anaa sa kapin o kulang usa ka gatos ka mga pulis ang gipakatap sa palibot sa korte aron masiguro ang seguridad ug mapatunhay ang kahapsay atol sa gitakdang pagtambong sa Bise Presidente.
Apan, ang gidaghanon sa mga tigpaluyo niadtong adlawa dili sama kadaghan sa dihang unang mitambong ang Bise Presidente niadtong Septiyembre 11, diin mas daghang tawo ang midagsa sa korte aron ipakita ang ilang suporta.
Hinuon, gipadayag ni Bise Presidente Duterte ang iyang pasalamat ngadto sa iyang mga higala ug mga tigpaluyo tungod sa ilang padayon nga pagsalig ug suporta.
Dugang pa, nagpasalamat usab siya sa iyang defense team ug mga abogado sa pagdumala sa kaso, ug gidayeg ang ilang kugihan ug dedikadong trabaho sa maong kaso.
