CEBU CITY — Mitahan sa kapulisan ang suspek human gituohang nakapusil-patay sa usa ka radio DJ sa dakbayan sa Tagbilaran, Bohol.
Napalgang naligo sa kaugalingong dugo si Rizalino Torralba o mas nailang “Inday Rufing” sa tinuod nga pangalan niadtong Marso 27 sa gabii sulod sa Room 8 sa Backpacker’s Inn, Brgy. Mansasa District sa nahisgutang dakbayan.
Matud ni Plt.Col. Mary Crystal Peralta sa Tagbilaran Police Station, nanawag sa buhatan niini ang suspek na giilang si Andrew Fronteras ug gi-angkon niini nga mao ang responsable sa maong krimen ngadto sa ka live-in partner nga si Inday Rufing.
Gibutyag ni Fronteras nga aksidente ang maong panghitabo gumikan sa panaglalis nga nisangpot sa pag-inilogay sa calibre 45 nga armas nga gipanag-iya sa suspek ug disgrasyang nakablit sa suspek ang armas hinungdan nga naigo ang tuong bahin sa dughan sa maong DJ.
Gitataw ni Peralta nga posible pang mabuhi si Inday Rufing kung dali pa kining nadala sa tambalanan apan gibyaan kini sa ka live-in human napusilan.
Dugang pa ni Peralta nga 20 ka tuig na ang duha nga nag-ipon.
Gipaubos na sa otopsiya ang patay’ng lawas ni Inday Rufing aron makatabang sa imbestigasyon sa otoridad.
Samtang gihikay na usab sa kapulisan ang kasong murder batok kang Fronteras ug nabalhog na kini sa detention cell sa Tagbilaran Police Station. (report ni Bombo Benjie Tanghiyan/GBS)
